Sitemap
TextSizeButtonSmall TextSizeButtonMed TextSizeButtonBig
Valmynd2
lifid
« 2018 »
« Júlí »
S M Ţ M F F L
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        
lifid
Facebook Skolastarfsemi Skolar dagskra
Utgefid efni HusinIbae
fimmtudagurinn 1. febrúar 2018

Bćjarbíll Súđavíkurhrepps til sölu

Mitsubishi L200, bæjarbíll Súðavíkurhrepps er auglýstur til sölu. Bíllinn er 2005 árgerð, með húsi yfir palli. Bílinn er ekinn 135.000 km, og er einkar vel með farin. Bónaður á fimmtudögum. Bílnum fylgja sumardek á felgum.

Óskað er eftir tilboðum í bílinn á netfangið sudavik@sudavik.is eða skriflega á skrifstofu sveitarfélagsins.

Lokafrestur til að gera tilboð er 7. mars.

Frekari upplýsingar gefur Guðrún Halldórsdóttir 8631019.

Súðavíkurheppur áskilur sér rétt til að hafna öllum tilboðum.

Byggð og samfélag í Súðavíkurhreppi stendur á tímamótum og til að nýta tækifæri og auðlindir svæðisins, þarf innspýtingu í atvinnulíf, jarðgöng og bætta þjónustu og fjárfestingar á ýmsum sviðum. Þetta kom fram á tveggja daga íbúaþingi sem haldið var í Súðavík 18. – 19. nóvember síðastliðinn. Vel var mætt og ungir sem aldnir íbúar tóku þátt í þinginu. Þingið tengist m.a. endurskoðun aðalskipulags sem nú er unnið að. Hér á eftir verður sagt frá helstu skilaboðum þingsins, en ítarlegri samantekt er að finna hér.

Atvinnusköpun og uppbygging Álftafjarðarganga, þetta tvennt hlaut afgerandi mest vægi í forgangsröðun þátttakenda á þinginu. Rætt var um ýmsa möguleika til atvinnusköpunar og metnir kostir og gallar við bæjarútgerð, kalkþörungavinnslu og laxeldi.  Einnig var rætt um mikilvægi þess að til verði störf sem krefjast menntunar. Horft er til ferðaþjónustu sem sóknarfæris, en huga þurfi að merkingum og markaðssetningu. Gera mætti meira úr sögunni og nýta betur það sem þegar er aðdráttarafl fyrir ferðamenn. Biðstaða er í laxeldismálum við Djúp en á þinginu kom fram jákvæðni gagnvart því að reyna að nýta þau tækifæri sem kunna að bjóðast í tengslum við sjókvíaeldi. Mikilvægt sé þó að fara varlega og gæta að neikvæðum áhrifum. Rætt var um jákvæð og neikvæð áhrif vegna mögulegrar kalkþörungaverksmiðju í Súðavík. Ýmis sjónarmið komu fram en samhljómur var um að huga verði að mótvægisaðgerðum, ef af verkefninu verður.

Málefni samfélagsins; framtíð aldraðra, menningareflandi samfélag og framtíð og þróun skólans var fólki einnig mjög ofarlega í huga. Þá komu fram nokkrar áhyggjur, en jafnframt hugmyndir, um þróun byggðar í Inndjúpi.

Æskilegt væri að byggja upp búsetukosti fyrir aldraða og var varpað fram hugmyndum til að auka félagsstarf eldri borgara, ekki síst karla. Á sviði menningar er hægt að gera margt með því að nýta aðstöðu sem nú þegar er til staðar, ásamt því að koma upp aðstöðu til dvalar fyrir listamenn. Veru listamanna á staðnum, væri hægt að tengja bæði við skólann og ferðaþjónustu“. Lýst var áhyggjum af þróun skólans, að hætta sé á að hann leggist af vegna fækkunar nemenda, en að smæð hans skapi einnig mikla sérstöðu og geti laðað að fólk til búsetu. Huga mætti að lotukennslu í ákveðnum greinum, að mati þátttakenda.

Byggð í Inndjúpi stendur á tímamótum og þar eru ýmsir möguleikar tengdir auðlindum eins og heitu vatni, veiði og virkjun vatnsfalla. Bregðast mætti við samdrætti í landbúnaði með samnýtingu jarða og grænmetisframleiðslu. Rætt var um fornleifar í Vatnsfirði, þar sem bæta þurfi aðstöðu og almennt þurfi að fjölga salernum og upplýsingaskiltum á svæðinu. Brýnt er að bæta viðhald á bryggjum við Ísafjarðardjúp, vegna ferðaþjónustu og öryggissjónarmiða. Þá komu fram áhyggjur af hugsanlegri skerðingu á þjónustu Vegagerðar við Djúpveg, með tilkomu Dýrafjarðarganga. 

Áhugi er á að tengja gamla og nýja þorpið í Súðavík með göngustíg og heimamenn eiga sér draum um torg við skólann. Kallað var eftir aukinni gróðursetningu trjáa, til skjólmyndunar, og fjölgun göngustíga, þar sem hugað verði að viðhaldi og lýsingu. Einnig var rætt um lengri gönguleiðir.

Í umræðu um íbúalýðræði kom fram áhugi á að halda þing íbúa að vori og hausti og að málum verði fylgt vel eftir. Rætt var um samverustundir íbúa af ólíkum þjóðernum og þjóðahátíð og lagt til að þorrablót verði áfram haldið í  íþróttahúsinu/skólanum í Súðavík.

Kortlagðir voru staðir þar sem huga þarf að umferðaröryggi og kallað var eftir bættum almenningssamgöngum. Fram komu hugmyndir um leiðir til að draga úr sorpi og minnka plastnotkun. Einnig varð umræða um skipulag tengt Raggagarði og úrbætur á aðkomu og merkingum. Þá var varpað fram hugmyndum um nýtingu björgunarsveitarhúss, m.a. til atvinnuuppbyggingar og heilsueflingar.

En hvaða möguleika sér yngri kynslóðin? Unglingadeild Súðavíkurskóla vann verkefni, sem nemendur kynntu á þinginu. Þeir hrósuðu mörgu sem vel er gert og eiga sér jafnframt drauma um betri íþróttaaðstöðu af ýmsum toga. Þau yngri eru sama sinnis og eldri kynslóðin, að Álftafjarðargöng myndu breyta öllu. Nemendur sögðu líka: „Samfélagið okkar í Súðavík er gott og hér finnst okkur gott að búa. Okkur þykir vænt um þorpið okkar og fólkið sem býr þar. Gerum þetta þorp að paradís, því hér viljum við vera.“

Umsjón með þinginu var í höndum Sigurborgar Kr. Hannesdóttur hjá ILDI, en þingið var haldið í samstarfi við Verkís, sem vinnur að endurskoðun aðalskipulags. Samantektin mun nýtast í skipulagsvinnunni, en sveitarstjórn mun jafnframt fjalla um skilaboð þingsins og taka afstöðu til málefna sem snerta sveitarfélagið. Einnig er hugsanlegt að íbúar vilji sjálfir vinna að einhverjum hugmyndum sem ræddar voru á íbúaþinginu. 

miđvikudagurinn 17. janúar 2018

Vegurinn um Súđavíkurhlíđ hefur veriđ opnađur

miđvikudagurinn 10. janúar 2018

Litiđ aftur, og svo fram veginn

Litið aftur, og svo fram veginn

„Með kjafti og klóm“

 

Síðasta fjárhagsáætlun sveitarstjórnar þetta kjörtímabilið var afgreidd samhljóða 14. desember 2017. Niðurstaðan sú að fjárhagsleg afkoma sveitarfélagsins heldur áfram að styrkjast umtalsvert, framkvæmdum fjölgar og fleiri viðhaldsverkefnum er sinnt.

Það er sérstök tilfinning að klára þennan krefjandi áfanga ársins, stefna og markmið sveitarfélagsins klár fyrir árið 2018. Það er eins og andrúmsloftið hafi fengið syndaaflausn þegar maður andar að sér umhverfinu eftir þennan síðasta sveitarstjórnarfund ársins.

Að auki eru þetta fyrstu merki þess að kjörtímabilinu fari að ljúka. Næst verður kosið í maí 2018, nýjar sveitarstjórnir munu í kjölfarið líta dagsins ljós. Kannski með klofin skjöld eftir átök kosningabaráttunnar – kannski með fulla tösku af sól og bjartsýni. Skiptir engu, framundan eru krefjandi verkefni, fyrir óhræddar hendur. Þannig, og bara þannig, gerum við betur í dag en í gær.

Óhrædd.

Eitt kjörtímabil dregur fram alla kosti og ókosti í einum sveitarstjórnarmanni. Sum mál sýna þínar bestu hliðar, „þvílíkur mannkostur“ er hrópað. Önnur draga fram breyska eiginleika, mann sem tók ekki rétta ákvörðun, „þvílíkur auli“ er kallað. Eitt er sameiginlegt báðum málum; á bakvið er einlægur vilji til að gera vel.

 Á milli sigla stóru verkefnin, þessi sem geyma mótun og framtíð samfélagsins í DNA þráðum sínum. Stundum hef ég það á tilfinningunni að stórum málunum hljóti að líða eins og Van Gogh, áður en heimurinn kveikti á þessum áhrifamanni listasögunnar. Áhrifamikil, afskipt, stundum örvingla af áheyrnarleysi.

Samanlagt gefur þetta mynd af manni - okkur. Við erum gott fólk sem vill vel. Við viljum stækka og þroskast, og glímum stöðugt við brestina í sjálfum okkur.

 

Litið til baka…

Fjárhagsleg styrking sveitarfélagsins

Sé horft aftur yfir kjörtímabilið sést árangur og framþróun, þegar kemur að stórum málum er varða tilvist og framtíð sveitarfélagsins. Fjárhagsleg afkoma sveitarfélagsins hefur styrkst mjög, svo eftir er tekið. Sjálfstæði sveitarfélaga felst ekki í sögu og tilfinningum, ekki í rómantík og sérstöðu einstaklinga, verkefna eða ættbálka. Sjálfstæði sveitarfélaga er bundið í fjárhagslegan styrk. Síðan má svitna yfir andleysi þessarar staðhæfingar – það breytir hins vegar ekki niðurstöðunni,  og um einbeittan vilja hins opinbera að fækka minni sveitarfélögum.

Samhent sveitarstjórn

Þegar horft er yfir kjörtímabilið sést samheldin sveitarstjórn sem glímdi sameiginlega við verkefni dagsins. Upptaktur síðustu kosninga gaf ekki vísbendingu um slíkt. Hvergi hefur komið fram ágreiningur sem ekki var hægt að leysa, nema í sátt og samtóna niðurstöðu. Í litlu samfélagi þarf klefinn að vera í lagi, annars vinnst ekki nokkur leikur. Klefinn, í þessu samhengi, er sveitarstjórn Súðavíkurhrepps, samlyndi og samvinna hennar er svar við spurningunni hvers vegna gangi svo vel í sveitarfélaginu.

Atvinnumál á skriði

Þegar horft er yfir kjörtímabilið sést glögglega áhersla sveitarstjórnar á uppbyggingu atvinnumála. Í upphafi kjörtímabilsins var tekin ákvörðun um að ganga til samstarfs við Marigot, móðurfélag Íslenska Kalkþörungafélagsins, um uppbyggingu á starfsemi félagsins í Súðavík. Þessi vinna hefur gengið vel, og stefnt er að framkvæmdum á næsta ári, gangi skipulagsbreytingar eftir. Í skýrslu KPMG, sem sveitarstjórn lét vinna fyrir sig á árinu kemur glögglega fram hvaða ávinningur hlýst af verkefninu. Í samantekt á KPMG kemur eftirfarandi fram:

  • Fjöldi beinna nýrra starfa nær hámarki í um 30 manns, sjö árum eftir að útflutningur hefst.
  • Fjöldi afleiddra starfa, sem verða til á svæðinu, verði um 12 á sama tíma.
  • Íbúar með afkomu vegna kalkþörungaverksmiðju verði um 90 á sama tíma.
  • Árlegar greiðslur til ríkissjóðs geta numið um 65 m.kr. og um 89 m.kr. til sveitarfélagsins þegar útflutningur er í hámarki og flest bein störf verða til.
  • Árlegar greiðslur til lífeyrissjóða nema um 36 m.kr. þegar útflutningur er í hámarki og flest bein störf verða til.
  • Árlegar greiðslur til sveitarfélagsins á atvinnusvæðinu geta numið um 89 m.kr. þegar útflutningur er í hámarki og flest bein störf verða til.
  • Árlegar greiðslur til Súðavíkurhrepps vegna hafnargjalda og annarra gjalda geta numið um 56 m.kr. þegar útflutningur er í hámarki og flest bein störf verða til.

 

Að undaskyldum laxeldisáformum í Ísafjarðardjúpi er því um að ræða stærsta einstaka atvinnuþróunarverkefni við Ísafjarðardjúp, sem lítið en metnaðarfullt sveitarfélag á Vestfjörðum heldur utan um. Verkefni sem geymir þann styrk í sér að geta breytt þróun byggðar í Súðavík, og verið öflugur samverkandi í viðsnúning Ísafjarðardjúpsins.  Auðvitað er verkefni af þessari stærðargráðu ekki óumdeilt. Af þeirri ástæðu hefur sveitarstjórn Súðavíkurhrepps kappkostað að halda sem flesta opna fundi um verkefnið á tímabilinu. Nú þegar hafa þrír fundir verið haldnir. Sá síðasti var haldin í Samkomuhúsinu í október, þar sem drög að umhverfismati voru kynnt. Íbúar þannig upplýstir um innihald skýrslunnar og gátu komið með fyrirspurnir. Í kjölfarið var hægt að senda inn umsagnir, ábendingar og gagnrýni.

Sveitarfélagið bindur miklar vonir við uppbyggingu laxeldis við Ísafjarðardjúp. Á kjörtímabilinu hafa fulltrúar sveitarfélagsins staðið í framvarðarsveit Vestfirðinga sem talað hafa, og barist, fyrir máli og réttlæti og skynsemi þessara atvinnuuppbyggingar. Uppbygging laxeldis á Vestfjörðum er ekki bara stærsta atvinnuþróunarmál fjórðungsins, heldur einnig réttlætismál fólksins sem byggir svæðið, ræktar land og líf og lifir fyrir vestfirska framtíð.

Ferðaþjónusta á Vestfjörðum er í stöðugum vexti og verður ein af kjölfestu-atvinnugreinum Vestfjarða um ókomna tíð. Á kjörtímabilinu beitti sveitarstjórn sér fyrir stofnun ferðaþjónustusamtaka Súðavíkurhrepps. Samtökunum er ætlað að gæta hagsmuna atvinnugreinarinnar innan sveitarfélagsins. Þá hafa framkvæmdarverkefni sveitarfélagsins verið mikilvægur stuðningur við atvinnugreinina. Þar má helst nefna framkvæmdir við Hvítanes, við helsta selalátur Vestfjarða, og síðan stærsta verkefni sveitarstjórnar þetta kjörtímailið, ljósleiðararvæðing Inndjúpsins.

Heildarendurskoðun aðalskipulags

Sveitarstjórn Súðavíkurhrepps ákvað á kjörtímabilinu að ráðast í heildarendurskoðun á aðalskipulagi sveitarfélagins. Fyrra skipulag hafði gildistíma til 2018. Sveitarstjórn var einhuga um að tvínóna ekki við hlutina og hefja strax vinnu við heildarendurskoðun. Slíkt er ekki sjálfsagt, mörg minni sveitarfélög eiga í miklum erfiðleikum með slíkar ákvarðanir, enda afar kostnaðarsamt ferli.

Verkefnið er risavaxið, og mun hafa grundvallandi áhrif á alla stefnumótun og þróun Súðavíkurhrepps næsta áratug. Verkefninu vindur vel áfram og vonir standa til um að skipulagsvinnan geti klárast á vor/sumarmánuðum og farið þá í umsagnar- og staðfestingarferli.

Íbúalýðræði

Eitt af áhersluverkefnum sveitarstjórnar hefur verið að efla íbúalýðræði og þátttöku. Af þessu tilefni hafa verið haldnir sex íbúafundir á kjörtímabilinu, og tveir íbúafundir vegna aðalskipulagsvinnu. Þá fór fram vel heppnað íbúaþing, undir stjórn Sigurborgar Kr. Hannesdóttur, í nóvember þar sem hugmyndum og sýn íbúa var safnað saman í skýrslu sem gefin verður út í upphafi nýs árs. Þessi skýrsla verður leiðarljós sveitarstjórnar fram í maí, og síðan næstu sveitarstjórnar sem tekur við í kjölfarið. Aukinheldur verður afurð þingins hluti af nýju aðalskipulagi sveitarfélagsins, sem er stefnumörkun sveitarfélagsins til næstu 20 ára.

Kaupfélagið

Í upphafi kjörtímabilsins stóð sveitarfélagið frammi fyrir því að þorpið var kaupfélagslaust. Slík staða er bæði áhugaverð og krefjandi fyrir samfélag eins og Súðavík. Súðavík er jaðarsamfélag í landfræðilegum skilningi. Fámennt landsbyggðarsamfélag sem einangrast tíðum yfir vetrartímann, vegna snjóflóða.  Í þessum aðstæðum er matvöruverslun grunnþjónusta. Hins vegar er það alls ekki skilgreint hlutverk sveitarstjórna að hlutast til um rekstur matvöruverslunar, jafnvel þótt algjör markaðsbrestur blasi við og allar leiðir til að laða að rekstraraðila hafi verið reyndar.

Sveitarstjórn Súðavíkurhrepps tók ákvörðun á vordögum 2015, eftir íbúafund, að stofna til reksturs matvöruverslunar í gegnum félag í fullri eigu Súðavíkurhrepps, Matvöruverslun Súðavíkurhrepps ehf.  Ákvörðun sveitarstjórnar grundvallaðist á þremur þáttum, færa þessa þjónustu til íbúa sveitarfélagsins, reka hana ekki með tapi og vera áfram með Kaupfélagið í söluferli.

Strax var farið í breytingar á versluninni til að laga reksturinn að hlutverki og þörfum eigandans. Í upphafi sumarins 2015 opnaði síðan lítil bókasafnsmatvöruverslunarkaffihúsaupplýsingamiðstöð sem fékk nafnið Kaupfélagið.

Verkefnið gekk ekki átakalaust, sé syndlaust, en niðurstaðan óumdeild fyrir almenning. Kaupfélagið færði meiri lífsgæði, öryggi og þjónustu til íbúa sveitarfélagsins og rak sig réttu megin við núllið.

Matvöruverslun Súðavíkurhrepps ehf. var síðan seld á haustdögum til nýrra rekstraraðila. Sveitarfélagið er því ekki lengur eigandi Kaupfélagsins, engu að síður er tryggt að sama þjónusta, og enn betri, verður starfrækt í Álftaveri næstu árin.  Mikil gleðitíðindi fyrir sveitarstjórn, íbúa og gesti Súðavíkurhrepps.

Markmiðum sveitarstjórnar var því að fullu náð með stofnun, rekstri og sölu Matvöruverslunar Súðavíkurhrepps ehf.

Samvinna vestfirskra sveitarfélaga.

Það ætti að vera forgangsmál hjá vestfirskum sveitarfélögum að finna samvinnu og samtakamátt í öllum verkefnum. Þannig eflist hin sameiginlega hagsmunabarátta og þjónusta við íbúa, lífsgæði aukast og Vestfirðir eygja þannig meiri möguleika á að ná vopnum sínum á ný.

Það er því veruleg ánægja sem fylgir því að klára stofnun Vestfjarðastofu og sannfæring, með vísan í ofansagt, að með henni eflist vestfirsk framtíð. Súðavíkurhreppur hefur gegnt lykilhlutverki í þessari vinnu og baráttu, með því að fara með formennsku í stjórn Fjórðungssambands Vestfjarða og síðan formennsku í stjórn Vestfjarðastofu. Vestfjarðastofa verður vettvangur fyrir vestfirskt sveitarstjórnarlíf, sem og vestfirskt atvinnu- og menningarlíf, til að sameina krafta sína og hugmyndir til eflingar lífs og framtíðar.

Það sem sameinar sveitarfélög á Vestfjörðum, öðru fremur, er að þau eru öll lítil. Það er ekki til stórt sveitarfélag í fjórðungnum. Slíkt er kostur - þannig eigum við að geta sýnt hvoru öðru skilning í stað yfirgangs. Allar ákvarðanir sem miða að því að færa vestfirsk sveitarfélög fjær hvort öðru í samvinnu og trausti eru rangar ákvarðanir og færa Vestfirðinga fjær því takmarki að ná upp krafti og seiglu fyrri tíma. Þetta er regla.

Mögulega sameinast einhver sveitarfélög í fjórðungnum í ókominni framtíð, rétt eins og annarsstaðar á landinu. Hitt er víst, slíkt mun aldrei gerast nema með þessum forleik; meiri samvinnu og trausti milli sveitarfélaga. Vestfjarðastofa er gott dæmi um slíkt.

 

…svo framveginn

Markmið og verkefni ársins 2018 eru margvísleg, upptalningin er ekki tæmandi.

Framkvæmdir

Stærsta framkvæmdaverkefni sveitarfélagsins á árinu 2017, var ljósleiðaravæðing Inndjúpsins. Haldið verður áfram með verkefnið á árinu 2018, og vonast er til að það geti klárast árið 2019 með heimtengingu allra bæja, fyrirtækja og þeirra frístundahúsa sem kjósa að vera með. Þetta verkefni sýnir glögglega hver forgangsröðun sveitarstjórnar er. Inndjúpið stendur höllum fæti og eðlilegt er að sveitarfélagið fjárfesti í innviðauppbyggingu til að gera svæðið samkeppnishæft og fýsilegan kost – atvinnu, og byggðarfært. Samvinna sveitarfélagsins við Orkubú Vestfjarða hefur verið til fyrirmyndar í þessu verkefni og sveitarfélagið bindur miklar vonir við framhaldið.

Þá er ráðgert að klára framkvæmdir á Hvítanesi, þar sem myndarleg aðstaða fyrir ferðamenn er að rísa við selalátrið yst á nesinu.

Viðhaldsmál

Helstu viðhaldverkefnin verða við Súðavíkurskóla og síðan verða íbúðarhúsin í Arnarflötinni tekin í gegn að utan og máluð. Sveitarfélagið eignaðist í desember 2017 Arnarflöt 5, rauða húsið, og er því eigandi að þremur húsum í götunni. Það hefur legið á málningarviðhaldi og verður það mikil prýði að hafa þennan Arnarflatar-regnboga, eitt af fallegum einkennum þorpsins, skínandi eftir sumarið.

Hafnarmál

Hafist verður handa við lengingu flotbryggju Súðavíkurhafnar á nýju ári. Bryggjan er alfarið í notkun Iceland Seaangling. Með flutningi, þess hluta, fyrirtækisins til Súðavíkur, sem áður hafði starfstöð á Tálknafirði, er nauðsynlegt að lengja bryggjuna um eitt bil. Ráðgert er að skipta um dekk á Miðgarði og Suðurgarði, auk þess sem Miðgarður verður ástandsskoðaður á árinu.  Þá verður sett upp árekstrarvörn/steinhleðsla, hafnarmegin, meðfram akveginum að Suðurgarði. Í athugun er að setja ferskvatnsslöngu á flotbryggjuna á Suðurgarði.

Formleg vinna við hönnun hafnarmannvirkja, vegna kalkþörungavinnslu innan við Langeyri hefst á nýju ári. Framkvæmdin verður langstærsta framkvæmdaverkefni sveitarfélagins í lengri tíma og mun hafa geysileg áhrif á þróun sveitarfélagsins.

Landbúnaðarmál

Í fjárhagsáætlun fyrir árið 2018 er veitt meira fé í veiðar á mink og ref. Þá samþykkti sveitarstjórn að veita styrk til kaupa á dróna, sem nýta á við haustleitir. Spennandi verkefni sem vonandi á eftir að auðvelda smalamennsku, sem getur verið erfið og langdregin í víðfeðmu sveitarfélagi.

Umhverfis og menningarmál

Sett verða upp steinker í vor, á valda staði í Súðavík, með sumarblómum, sem verður hluti af umhverfis- og fegrunarátaki þorpsins. Ráðgert er að klára hönnun og hefja framkvæmdir við göngustígaátak í Súðavík. Eftir framkvæmdir verður samfelldur göngustígur í kringum tjörnina, að tjaldstæðinu í Sumarþorpinu.

Margræddu hvalsporða/hvalveiðisöguverkefni verður lokið með uppsetningu á hvalsporðum umhverfis tjörnina, verður verkefnið samstíga göngustígaframkvæmdum. Þá er hönnun á Torglundi, við hliðina á leikskólanum á samþykktri fjárhagsáætlun.

Í fjárhagsáætlun fyrir árið 2018 er 2 millj. styrkur til sögusýningar sem stefnt er á að setja upp í Súðavík fyrir næsta sumar. Verkefnið verður kynnt frekar í upphafi nýs árs á opnum fundi.

Skipulagsmál

Ráðgert er að klára heildarendurskoðun á aðalskipulagi sveitarfélagsins á árinu, eins og áður hefur verið minnst á. Með nýju aðalskipulagi verður sveitarfélagið komið með gífurlega vandað og efnismikið stefnumótunarplagg til næstu ára.

Lýðheilsumál.

Verkefnið Heilsueflandi samfélag verður áfram keyrt í sveitarfélaginu. Frítt verður fyrir íbúa sveitarfélagsins í líkamsrækt á Langeyri.

Frístundastyrkir verða greiddir vegna þátttöku barna og unglinga í íþrótta- og æskulýðsstarfi.

Fjárhagsleg afkoma 2018

Gert er ráð fyrir að afkoma samstæðunnar, A og B hluti reksturs Súðavíkurhrepps ,verði jákvæð um 39 milljónir. Þá hækkar handbært fé frá rekstri um 18 milljónir á árinu, gangi áætlun eftir.

Skuldahlutfall samstæðunnar verður 28% og hefur farið lækkandi.

 Með kjafti og klóm

Lítil sveitarfélög róa lífróður fyrir tilverurétti sínum þessi misserin. Fjárhagsleg staða þeirra er æði misjöfn, og ljóst er að þau sveitarfélög sem ekki búa við öruggan rekstur eiga erfiða baráttu fyrir höndum, sé vilji til að vernda sjálfstæði sveitarfélagsins.

Fjöregg sveitarfélagsins er í höndum sveitarstjórnar. Séu ekki skýr skilaboð um annað er það meginhlutverk sveitarstjórnar að verja tilverurétt sveitarfélagsins, efla framtíð þess og fjórðungsins og verja velferð íbúa, með kjafti og klóm.

Niðurstaða fjárhagsáætlunar sveitarstjórnar Súðavíkurhrepps fyrir árið 2018, atvinnustefna sveitarfélagins, forgangsröðun skólamála,  sem og öll önnur verk og vinna kjörtímabilsins, skal lesa með þeirri sannfæringu og einbeitta vilja; með kjafti og klóm!

Staða Súðavíkurhrepps hefur styrkst umtalsvert á kjörtímabilinu, hvort sem það er núverandi staða eða framtíðarmöguleikar. Hins vegar eru krefjandi verkefni framundan, og ekkert í hendi.  Það tekur skamma stund að snúa jákvæðri þróun til fyrri vega.

Einn knattspyrnuþálfari orðaði þetta svona; „fyrst þarftu gott líkamlegt form til að eygja möguleika á tímabilinu. Það kostar vinnu. Svo þarftu stórt hjarta og beittan huga til sigra tímabilið. Það kostar vinnu“.

Tímabilið er framundan.

Lifi Súðavíkurhreppur, eflist Vestfirðir, Íslandi allt!

 

Skrifað í Súðavík, 2. janúar 2018

Pétur G. Markan

Sveitarstjóri Súðavíkurhrepps

 

laugardagurinn 6. janúar 2018

Veginum um Súđavíkurhlíđ lokađ.

Veginum um Súðavíkurhlíð hefur verið lokað vegna snjóflóðahættu. Ákvörðun um opnun verður tekin í birtingu sunnudagsins.

 

 

mánudagurinn 1. janúar 2018

Gleđilegt nýtt ár!

fimmtudagurinn 28. desember 2017

Áramótabrenna í Súđavík á gamlárskvöld

Árleg áramótabrenna verður að venju í fjöruborðinu fyrir neðan Súðavíkurskóla. Brennan hefst kl. 20. 

 

Sjáumst kát og þökkum fyrir gott ár.

laugardagurinn 23. desember 2017

Gleđilega hátíđ!

Á 48. fundi sveitarstjórnar Súðavíkurhrepps samþykkti sveitarstjórn álagningu, gjaldskrá og fjárhagsáætlun fyrir árið 2018.

Gjaldskrá sveitarfélagsins mun fylgja þjóðhagspá og hækka um 2, 7 %.

Álagning mun haldast óbreytt, að útsvari undanskyldu. Árið 2011 tóku íslensk sveitarfélög við málefnum fatlaðra frá ríkinu. Við þann yfirflutning var hámarksútsvar hækkað úr 14,48% í 14,52% til að fjármagna aukin útgjöld sveitarfélaga vegna málaflokksins. Þessi hækkun hefur hins vegar ekki verið framkvæmd Súðavíkurhreppi, og útsvarið haldist óbreytt í 14,48%.

Nú eru breytingar framundan hjá jöfnunarsjóði sveitarfélaga, sem kynntar voru á síðustu fjármálaráðstefnu sveitarfélaga, þar sem sveitarfélög sem ekki eru með hámarks útsvar munu verða fyrir skerðingu á framlögum sjóðsins næstkomandi árum. Með hliðsjón af hlutfalli jöfnunarsjóðs af heildartekjum sveitarfélagsins taldi sveitarstjórn það vera nauðsynlegt á þessum tímapunkti, með hliðsjón af ofangreindu, að hækka útsvar í Súðavíkurhreppi í 14,52%.

Fjárhagsáætlun sveitarfélagins fyrir árið 2018 var samþykkt samhljóða. Það er vert að vekja athygli á því að afgreiðsla fjárhagsáætlunar sveitarfélagins, álagning og gjaldskrá hefur verið á þessu kjörtímabili samhljóða í öll skiptin. Það eitt segir sögu um samhenta og samstíga sveitarstjórn, sem vinnur sem ein fyrir framtíð sveitarfélagsins. Slíkt er ekki sjálfgefið í pólitík, er fáséð gæfa og ber að þakka fyrir.

  • Gert er ráð fyrir að heildartekjur A og B hluta verði 310 milljónir. Heildarútgjöld verði 254 milljónir.
  • Rekstrarniðurstaða fyrir fjármagnsliði verður 43 milljónir.
  • Rekstrarniðurstaða verður því jákvæð, eftir fjármagnsliði, um 39 milljónir.
  • Hækkun á handbæru fé verður 18,1 milljón.
  • Skuldahlutfall sveitarfélagins verður 29% í samtæðunni allri.
  • Áætlað að framkvæma fyrir 12 milljónir á árinu. Fjármagnað af eigin fé.
  • Farið verður í viðhaldsverkefni á Súðavíkurskóla, götum og Arnaflatarhúsunum.

Aðvörun hefur borist frá ríkislögreglustjóra til almannavarnadeilda vegna mögulegra flóða, vatnavaxta og asahláku á aðfararnótt mánudags.

 

Bæjarstarfsmenn munu undirbúa ræsi um helgina og verða í viðbragðsstöðu vegna veðurspánnar.

 

Mikilvægt er að íbúar og húseigendur geri ráðstafanir vegna þessa.

 

Sími bæjarstarfsmanns er 863 - 1019, sveitarstjóra 698 - 4842 og slökkviliðsstjóra 861 - 4658, ef upplýsingar eða aðstoð vantar.   

Eldri fćrslur
Vefumsjón