Sitemap
TextSizeButtonSmall TextSizeButtonMed TextSizeButtonBig
Valmynd2
lifid
« 2020 »
« Júlí »
S M Ţ M F F L
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31  
lifid
Facebook Skolastarfsemi Skolar dagskra
Utgefid efni
ţriđjudagurinn 7. apríl 2020

Afgreiđsla Póstsins í Súđavík

Kæra fólk, viðskiptavinir Póstsins.

Við viljum vekja athygli á breyttum afgreiðslutíma Póstsins í Súðavík.

Afgreiðsla verður, um óákveðinn tíma frá og með 8. apríl opin virka daga frá 12:00 - 13:30.

Til að takmarka þann tíma sem afgreiðsla tekur - notið forskráningu eftir því sem við á á posturinn.is

Vinsamlegast virði takmörkun við einn í afgreiðslu hverju sinni, passið kurteisisfjarlægð - 2 m - hinkrið frami meðan beðið er þjónustu.

Starfsfólk Póstsins - Súðavík.

Kæru íbúar Súðavíkurhrepps.

Líkt og fram kemur á vef Heilbrigðisstofnunar Vestfjarða (HVEST) eru boðaðar hertar aðgerðir vegna COVID-19 m.a. í Súðavíkurhreppi. Vísast til fréttar á vef hvest.is. Aðgerðir voru boðaðar í dag, 5. apríl 2020, en lokun leikskóla á að taka gildi frá og með morgundeginum, 6. apríl 2020. 

Samkvæmt því sem þar er boðað er óhjákvæmilegt að loka leikskólanum í Súðavík, en grunnskóli er kominn í páskafrí. Lokun mun vara um óákveðinn tíma. Segir m.a. á vefnum:  

Í ljósi nýrra smitrakninga á norðanverðum Vestfjörðum hefur aðgerðastjórn almannavarna á Vestfjörðum í samráði við sóttvarnalækni og almannavarnadeild ríkislögreglustjóra ákveðið að bregðast enn frekar við COVID-19 á Suðureyri, Flateyri, Þingeyri og Súðavík með hertum aðgerðum, eins og hér greinir:

  • Leik- og grunn­skól­um á Suðueyri, Flateyri, Þingeyri og Súðavík verði lokað frá og með morg­un­deg­in­um 6. apríl 2020. Þó skulu börn á for­gangslist­um fá vist­un á leik­skól­um og 1. og 2. bekkj­um grunn­skóla.
  • Sam­komu­bann verði miðað við 5 manns (þetta á þó ekki við um fjöl­skyld­ur sem búa á sama heim­ili).
  • Fjöldi viðskipta­vina í stærri versl­un­um (>150 fer­metr­ar) sé að há­marki 30 á hverj­um tíma.

Hvatt er til þess að fólk haldi sig heima, haldi sam­skipta­fjar­lægð, tak­marki ferðir og fylgi leiðbein­ing­um yf­ir­valda.

Þeim vinnu­stöðum eða hóp­um sem telja sig þurfa und­anþágu er bent á að sækja um slíkt hjá heil­brigðisráðuneyt­inu.

Fimm ný smit komu upp á síðasta sólhring og tengjast þau öll norðanverðum Vestfjörðum. Smitrakning stendur yfir og beðið er niðurstöðu nokkurs fjölda sýna sem tekin hafa verið.

Hafa ber í huga öll framangreind atriði er varða samkomur og takmarkanir á fjölda í verslunum og samkomum, enda sækja íbúar hreppsins talsvert sína þjónustu til Ísafjarðarbæjar. Allar sömu takmarkanir eiga við þar er en þó með þeim formerkjum sem eiga við eftir byggðarkjörnum.  

Þeim sem hafa spurningar vegna þessa er bent á að hafa samband, eftir atvikum, við Lögregluna á Vestfjörðum - yfirstjorn-lvf@logreglan.is og á facebooksíðu Lögreglunnar á Vestfjörðum. 

Líkt og annars staðar á landinu breytist staðan dag frá degi varðandi einstaka sveitarfélög, enda eru smitrakningar virkt úrræði sem virðist vera að virka vel á landsvísu. Því er mikilvægt að allar boðaðar aðgerðir séu virtar hvað varðar samkomubann og annað það sem kann að breytast hér frá og með morgundeginum. 

Allar upplýsingar eru uppfærðar á síðunni covid.is og er bent á upplýsingar sem birtar eru þar varðandi stöðun frá degi til dags. Upplýsingar fyrir svæðið eru uppfærðar á síðu HVEST á hvest.is.

Verslun hér í Súðavík - Kaupfélagið - er að taka mið af breyttu fyrirkomulagi og er þeim sem þar eiga leið um bent á að einnig er unnt að fá heimsent. Hægt er að panta vörur gegnum sms (837 2800) eða með tölvupósti á info@margfaetlur.is. Einnig má finna Kaupfélagið Súðavík á facebook. 

Undirritaður hefur kappkostað að hafa samband vegna þeirra aðgerða sem nú eru boðaðar á svæðinu og ætla má að flestum sem þetta varðar beint, venga atvinnu eða þjónustu, hafi verið gert viðvart og/eða staðfest er að viti af samkomubanni og lokun leikskóla. 

Líkt og fram kemur í þeim upplýsingum sem vísað er til hér í tenglum er unnt að hafa samband við hjálparsíma Rauða Kross Íslands í síma 1717 - erindi sem varða áhyggjur eða fyrirspurnir þeirra sem dvelja í einangrun eða sóttkví.

Með kærri kveðju, 

Bragi Þór Thoroddsen - sveitarstjóri Súðavíkurhrepps 

 

laugardagurinn 4. apríl 2020

4.4.2020

Sæl verið þið öll íbúar Súðavíkurhrepps.

Það hefur ekki farið fram hjá neinum hvað gengur yfir okkur þessa dagana. Samkomubann og ýmsar varúðarráðstafanir eru í gangi vegna COVID-19. Það er raunar erfitt að stinga niður staf án þess að nefna þennan fjára með einum eða öðrum hætti, enda snertir þetta okkur öll. 

Tölfræðin er með okkur í augnablikinu hér í Súðavíkurhreppi, en það er ekki þar með sagt að við eigum ekki við þetta hér með einum eða öðrum hætti. Þegar þetta er ritað veit ég ekki til þess að smit hafi komið upp í hreppnum, en það er líkt hér og með nágranna okkar, alveg meðan ekkert er að frétta er það þannig. 

Við eru öll með nágrönnum okkar í liði - Bolungarvík og Ísafjarðarbæ, enda er staðan að þyngjast þar í viðureign við það að halda utan um hlutina. Fyrir mína parta, mér finnst til fyrirmyndar hvernig bæjarstjórinn í Bolungarvík tekst á við verkefnið í bænum, enda dró þar fyrst til tíðinda með uppgötvun þessa vágests. 

Ég er þannig gerður að ég þykist vera ónæmur fyrir öllu þar til ég er það ekki, held að ég sé bara eins og við flest að ég held alltaf að hlutirnir eigi við aðra en sjálfan mig alveg þangað til ég stend í hringiðunni miðri. Við getum ekki leyft okkur þann munað nú í dag, það er bara eitthvað annað á ferðinni en við erum gerð til þess að takast á við. Við verðum að virka sem lið, öll sem eitt, standa saman, virða reglur og það sem boðað er í smitvörnum og allri hegðan okkar þar til annað verður gefið út. 

Ég veit að ég hef ekki þá lífsreynslu að geta gefið öðrum óyggjandi fyrirmæli um hvernig á að takast á við það sem við skulum kalla afleiðingar þessarar reynslu sem við ætlum að eiga að baki sem fyrst. Í það minnsta má orða það sem svo að það er ekkert verið að grínast með hlutina eins og þeir eru í dag. Þó er ég talsmaður þess að horfa með gríngleraugum flest, en það verður allt að eiga sinn tíma. 

Þessi vetur ætlar seint að sleppa klónum hér fyrir vestan líkt og víðast um land. Ég sá það ekki fyrir þegar ég fluttist í Súðavíkina sl. vor að hér yrði snjómokstur nær allar vikur frá og með miðjum desember innan þorps. Þá auðvitað sá ég ekki fyrir að við ættum eftir að takast á við það að það væri meira og minna appelsínugulur blær á veðurspám fyrir Vestfirðina, en auðvitað hafa fleiri landshlutar fengið sinn skerf. En ég er ekki með neinn efa í mér að hér er þetta allt þess virði að búa við.

Náttúruna hemjum við ekki eða henna dynti, enda ekki okkar hlutverk. Við getum bara stýrt því hvernig við horfum á hlutina og erum sjálf okkar gæfusmiðir frá degi til dags. Auðvitað berst ég fyrir því með ykkur öllum að við fáum eitthvað af þeim tækjum til þess að létta okkur þessa baráttu svo sem með bættum samgöngum og tækjum til þess að byggja upp stöðugt atvinnulíf.

Mín skilaboð til allra í dag eru þau að, meðan við vitum ekki til þess að hér sé komið smit í hreppinn, þá erum við með fólkinu öllu í fjórðungnum í liði eins og landinu öllu. Við fylgjumst með frá degi til dags hvað er boðað í því að verjast fyrir okkur sjálf, fyrir aðra og pössum upp á heilsuna okkar. Heilsuna sem við ætlum að nýta til hins ýtrasta með öllum sem okkur standa næst þegar kemur sá tími að við fáum að njóta aftur samveru án þess að hafa að lágmarki tvo metra í næsta mann. Auðvitað er okkur flestum tamt að eiga þar meiri nánd en svo, enda lífið næsta litlaust án þess til lengdar. 

Á undarlegum tímum gerast auðvitað líka jákvæðir hlutir. Hér munum við snúa plönum okkar á þá lund að meiri sveigjanleiki verði í öllum okkar háttum, held að það verði lærdómurinn sem fæst úr þessu öllu. Við munum þakka fyrir heilsu okkar og fókið í kringum okkur, áður sjálfgefnir hlutir fara vonandi að verða okkur dýrmætari frá degi til dags. Og auðvitað mun athygli okkar allra vera á því að vona það besta og gera ráð fyrir hinu versta, en umfram allt passa upp á umgengni við allt og alla með reynslu okkar í huga.

Ég er maður einföldunar ef það er hægt - Thorbjörn Egner var fyrirferðamikill þegar ég var að vaxa úr grasi. Finnst raunar margt af þeim sannleika og gullkornum hafa sannað sig í gegnum tíðina. Ekki bara að öll dýrin í skóginum séu vinir, heldur að - fátt sé svo með öllu illt að ekki boði nokkuð gott. Gangi ykkur öllum vel og ég vona að þið eigið sem besta daga, nú sem endranær. 

Með kærri kveðju, 

Bragi Þór Thoroddsen - sveitarstjóri Súðavíkurhrepps 

 

Ýmissa áhrifa er farið að gæta af völdum COVID-19 hér á Vestfjörðum líkt og um landa allt. Ferðaþjónusta er líklega sú grein sem fyrst varð fyrir sýnilegum áhrifum með afbókanir en líkast til verða fáir atvinnurekendur eða stofnanir ósnertar af afleiðingum faraldursins. 

Súðavíkurhreppur hefur þegar fengið beiðnir um frestun gjalddaga vegna fasteignagjalda og annað því tengt. Þeim fyrirtækjum sem verða fyrir beinum afleiðingum af COVID-19 á rekstur er bent á að hafa samband við skrifstofu Súðavíkurhrepps eða sveitarstjóra beint. Senda má tölvupóst á sudavik@sudavik.is og tilgreina starfsemi og ástæður þess að óskað er eftir frestun gjalddaga eða hverra annarra aðgerða af hálfu Súðavíkurhrepps til stuðnings atvinnustarfsemi. 

Ekki liggur enn fyrir hvort lagabreytingar verða samþykktar sem heimila niðurfellingu fasteignaskatts eða lækkun, en fyrsta skrefið getur falist í frestun gjalddaga meðan staðan skýrist með rekstur í því umhverfi sem skapast hefur. 

Súðavíkuhreppur mun fara í allar þær framkvæmdir sem unnt er að koma að sem áformaðar hafa verið. Þá mun sveitarfélagið kappkosta að taka að fullu þátt í þeim aðgerðum sem boðaðar hafa verið til þess að efla atvinnu með þeim tækifærum sem felast í viðhaldi mannvirkja og uppbyggingu heima í héraði.

Með kærri kveðju,

Bragi Þór Thoroddsen fh. Súðavíkurhrepps 

ţriđjudagurinn 24. mars 2020

COVID-19 - Áhrifin á samfélagiđ nćr og fjćr

Í dag - 24. mars 2020, er heimsfaraldur COVID-19 eins og veiran hefur verið nefnd, farinn að verða meira alvörumál hér á Íslandi en við hefðum flest getað gert okkur grein fyrir þegar fyrstu fréttir bárust af þessum vágesti. Smitaðir á Íslandi skipta hundruðum og virðist útbreiðsla enn vera í sókn. Smit eru farin að stinga sér niður um allt land og finnast nú smitaðir í öllum landshlutum. Líkast til er það bara dagaspursmál hvenær við þurfum að takast á við þetta hér í Súðavíkurhreppi og hér á norðanverðum Vestfjörðum. 

Margir eru í sóttkví á Patreksfirði, einhverjir á Bíldudal og Tálknafirði og eflaust verður staðan hér lík því sem þar gerist innan skamms hér fyrir norðan. 

Atvinnulífið er viðkvæmt fyrir þessum vágesti, einkum meðan enn eru einhverjar varnir uppi og samkomubann er viðhaft til þess að reyna að hindra útbreiðslu. Skólar og aðrar opinberar stofnanir hafa sætt lokunum og skertri þjónustu og allur annar bragur er á. Boðað hefur verið að starfsemi skóla verði sem mest óskert fyrir yngstu hópa og eru það nýjustu tilmæli Landlæknis og Sóttvarnalæknis, en þar er verið að reyna að verja atvinnulífið og lykilstarfsmenn í framlínu. Er það mat yfirvalda að börn séu ekki útsett fyrir smiti eða líklegir smitberar að það sé áhættunnar virði að halda úti skólastarfi og opnun leikskóla. 

Nauðsynlegt er að sem flestar stofnanir og fyrirtæki virki þrátt fyrir að búið sé að draga úr þjónustu á mörgum sviðum. Margt af þjónustu- og framleiðslugreinum eru þó það mikilvægir þættir í okkar samfélagi að við reiðum okkur öll meira og minna á virkni þeirra. Ekki þarf að fjölyrða um þær stofnanir sem lúta að heilbrigði okkar og öryggi á tímum sem þessum. 

Í Súðavík og Súðavíkurhreppi öllum býr fólk sem er í framleiðslugreinum og veitir þjónustu sem enn er mikilvægt að halda úti og miklvægt að geti starfað áfram. Á það ekki síst við framleiðslugreinar líkt og fiskvinnslu og tengd fyriritæki, en þar starfar jafnan margt fólk á sama stað og í slíkri nálægð að mjög mikilvægt er að viðhafa alla þá varúð sem unnt er í samskiptum og umgengni. 

Þeir sem reka slíka starfsemi og eru ábyrgir fyrir henni eiga því mikið undir því að starfsfólk þeirra veikist ekki eða mæti smitað á vinnustaði. Afar mikilvægt er því fyrir þá sem starfa við slíkar greinar, á mannmörgum vinnustöðum, að viðhafa þá varúð sem unnt er og vera vakandi yfir eigin heilsu og samstarfsmanna sinna. Ekki þarf að fjölyrða um það þegar smit nær inn á vinnustaði enda örðugt að fylla skörðin ef fjöldasmit verður á vinnustað. 

Okkur sem störfum hjá Súðavíkurhreppi er jafn mikilvægt að huga að okkar heilsu, enda erum við fámenn þrátt fyrir að Súðavíkuhreppur sé stærsti vinnuveitandinn á staðnum. Þjónusta okkar veltur á því að við séum til staðar og heil heilsu, enda höfum við ekki fólk á staðnum til þess að ganga í okkar störf. Við höfum reynt að setja upp varnir á staðnum eins langt og það nær, en mikilvægt er að þeir sem eiga leið um vinnustað okkar virði þau mörk - haldi fjarlægð við okkur eins og unnt er og noti alla skynsemi við samskipti. Á þetta ekki síst við þar sem við sinnum póstþjónustu inn á skrifstofu Súðavíkurhrepps og er skrifstofan því opnari en almennt gerist með slíka vinnustaði.

Ég set inn þessar upplýsingar enda stendur mér nokkuð nær að reyna að passa upp á við við sem störfum fyrir Súðavíkurhrepp getum gert það sem lengst og haldið úti þeirri þjónustu sem að sveitarfélaginu snýr. Þá vil ég beina því til þeirra sem eiga erindi við sveitarfélagið, sveitarstjóra eða sveitarstjórn að nota símann, tölvupóst eða önnur slík úrræði sem unnt er. Það er erfitt að gera sér grein fyrir hver er smitaður, smitandi eða jafnvel að veikjast eftir því sem upplýsingar Landlæknis, Almannavarna og Sóttvarnalæknis benda til. 

Það verður vonandi sú tíð aftur innan skamms að fólk geti heilsast eins og siður er hér, með þeirri nálægð og nánd sem við á hverju sinni. En meðan við þurfum að kljást við þennan óvænta gest sem ekki er sýnilegur okkur þá þurfum við að gæta allrar varúðar sem annars væri nánast óhugsandi annars. Notum bros, símann og önnur fjarskipti og umfram allt skulum við nota skynsemina í öllum okkar athöfnum og samskiptum á næstunni, verum spariútgáfan og okkar besta útgáfa fyrir okkur sjálf og náungann. Þetta verður að baki fyrr en varir og vonandi þannig að við komum sem mest án skaða frá þessu. 

Ítreka að benda öllum á það sem hafa einhverjar spurningar að skoða covid.is og fylgja þeim leiðbeiningum sem þar eru uppfærðar eftir því sem þekkingin eykst á þessum vágesti.  

Bragi Þór Thoroddsen - sveitarstjóri Súðavíkurhrepps. 

 

 

mánudagurinn 23. mars 2020

Afgreiđsla pósts í Grundarstrćti

Kæru íbúar Súðavíkurhrepps og aðrir sem eiga erindi á afgreiðslu Póstsins eða skrifstofu Súðavíkurhrepps!

Afgreiðsla Póstsins er á skrifstofu Súðavíkurhrepps í Grundarstræti og þannig samtvinnuð annari starfseminni í húsinu. Því viljum við benda á eftirfarandi við afgreiðslu pósts:

* Spritt/gerileyðir er við innganginn - vinsamlegast notið. 

* Viðhafið alla þá varúð sem unnt er og leiðbeint hefur verið um af Almannavörnum - Landlækni og Sóttvarnalækni. 

* Ekki koma ef þið hafið grun um að þið séuð smituð - ef þið hafið einkenni sem benda til þess eða hafið umgengist einhverja sem þið teljið smitaða. 

* Ekki verður tekið við peningagreiðslum með seðlum eða klinki vegna pósts eða sendinga. 

* Pakkar sem senda á eða ábyrgðarbréf skal skrá á postur.is - koma með skráð númer í afgreiðslu. 

* Passa upp á fjarlægð við starfsfólk í afgreiðslu - halda u.þ.b. 2 m eins og ráðlagt er af Almannavörnum og Landlækni. 

* Aðeins einn viðskiptavinur komi inn í afgreiðslu í einu - þeir sem eiga erindi komi einir eins og unnt er að koma við. 

* Forðast alla snertingu við afgreiðsluborð svo sem því verður við komið. 

Nánari upplýsingar um hertar aðgerðir vegna COVID-19 má finna á vefsíðunni covid.is

Mikilvægt er að hafa alla varúð enda er starfsemi okkar hér í Grundarstræti meira og minna háð sama starfsfólki við afgreiðslu pósts og daglegan rekstur sveitarfélagsins. 

Umfram allt - viðhafið alla almenna skynsemið þegar kemur að því að takast á við það ástand sem uppi er. Húmor og léttleiki hjálpar okkur helling, bros í stað snertingar. 

Kær kveðja, 

Starfsfólk Súðavíkurhrepps og Póstsins. 

 

 

sunnudagurinn 22. mars 2020

22. mars 2020

Góðan daginn gott fólk. 

Það verður ekki hjá því komist að minnast á mál málanna - COVID-19 faraldur sem geisar um heiminn. Faraldurinn er nú orðinn alvara hér á landi, enda virðist útbreiðsla farin að verða meiri en áður og fjöldasmit farin að gera vart við sig. Og fámennið er ekkert að fara betur út úr þessu en höfuðborgarsvæðið svo við erum ekkert betur sett hér í Súðavík en annars staðar á landinu.

Til að byrja með voru atvik helst að koma upp vegna komufarþega frá Evrópu, en þriðjukynslóðarsmit voru tilkynnt fyrir skemmstu. Það er - fólk sem smitast ekki erlendis en smitast af fólki sem hefur smitast hér á landi. Hægt er að skoða það helsta sem er á döfinni varðandi útbreiðslu og aðgerðir stjórnvalda á covid.is/

Á síðunni https://www.covid.is/ eru birtar þær tilkynningar sem vert er að kynna sér ef einhverja spurningar vakna, svo sem um aðgerðir og þá staði sem helst eru til skoðunar. Þá er Almannavarnardeild ríkislögreglustjóra með facebook síðu - facebook.com/Almannavarnir/ og unnt að nálgast þar frekari fyrirmæli og tilkynningar.  

Í Súðavíkurhreppi þurfum við að viðhafa allar helstu varnir sem búið er að benda á - handþvott - spritt og almenna skynsemi. Mælt er með því að halda áveðinni fjarlægð við fólk sem ekki umgengst daglega, ráðlagt að halda um tveggja metra bili milli manna. Þetta er auðvitað erfitt í framkvæmd á sumum stöðum en gott að hafa í huga. Hins vegar er orðið ljóst að enn er verið að herða á öllum boðuðum aðgerðum Almannavarna og Embættis sóttvarnalæknis og Landlæknisembættisins. Sjá frétt af RÚV frá því í dag.

Í Súðavík verður tekið mið af öllum boðuðum aðgerðum við skólahald, íþróttakennslu og æfingar. Fólki er bent á að virða þær ábendingar sem eru á hverjum stað s.s. í skólanum, leikskóla, hreppskrifstofu og afgreiðslu pósts. Þá er einnig rétt að benda á að eldriborgarastarfið í Grundarstræti verður líka undir þeim formerkjum að viðhafa þarf þar sérstaka aðgát og verður lokað öllum sem ekki eiga þar erindi. Öll samskipti verða að vera í lágmarki þar sem því verður við komið með snertingu eða samkomu.

Það er nauðsynlegt að hreyfa sig þar til annað verður auglýst - við höldum geðheilsu með því að takasta á við þetta með léttleika og kærleikann að vopni enda næsta fátt annað í boði. Við hjálpumst að - virðum boð og bönn sem nauðsynlega verða sett á - verum jákvæð og njótum hvers dags eins og unnt er - heima er best.

Þrátt fyrir að hér sé enn talsverður snjór verðum við að trúa því að lóan boði vor þrátt fyrir að landið hafi tekið frekar óblíðlega á móti henni. Í það minnsta hefur ofankoman breyst í regn sem er fátítt frá því í haust. 

Bragi Þór Thoroddsen sveitarstjóri Súðavíkurhrepps

fimmtudagurinn 13. febrúar 2020

Skólahald fellur niđur í Súđavíkurskóla

Ákveðið er að fella niður skólahald í Súðavíkurskóla á morgun, 14. febrúar 2020. Þetta varðar skólahald á öllum stigum, leikskóla, grunnskóla og tónlistarskóla. Ákvörðunin tekur mið af sérstaklega vondri veðurspá fyrir allt landið. Þar er horft til viðvarana og viðbúnaðar allra helstu yfirvalda sem hafa með almannaheill að gera. Sjá almannavarnir

Sjá einnig veður á mbl.is/vedur.

 

fimmtudagurinn 13. febrúar 2020

Veđurviđvörun fyrir landiđ nćsta sólarhringinn.

Búið er að gefa út veðurviðvörun fyrir allt landið vegna óvenju djúprar lægðar. Búist er við að veðrið skelli á í nótt eða morgun hér á Vestfjörðum samkvæmt veðurspá. Samkvæmt helstu miðlum má búast við óvenju djúpri lægð með hvaðssviðri og ofsaveðri víða um landið, einkum þó á suðurhluta landsins. Ríkislögreglustjóri hefur lýst yfir óvissustigi fyrir allt landið sbr. mbl.is og almannavarnir.is og almannavarnir á fb.

Bent er á veðurspá á belgingur.is og öllum bent á að huga að lausum munum vegna hættu á foktjóni auk þess sem ráðlegast er að passa upp á glugga sem standa áveðurs. Búast má við a.m.k. einhverjum truflunum af veðrinu í það minnsta, enda lögð áhersla á að taka mið af veðri og veðurspá og ekki gert ráð fyrir ferðaveðri meðan lægðin gengur yfir. Hér má skoða færð á vegum vegagerdin.is

Þeim sem eru með báta er bent á að huga að þeim áður en veðrið gengur yfir, tryggja að þeir séu tryggilega bundnir og lensaðir eða snjó mokað af þeim eftir þörfum. Þá er aðallega að viðhafa almenna skynsemi um hættu sem snýr að lausamunum og frágangi húsa. 

Bent er á eftirfarandi vegna tilkynninga:

Ofsaveður - frettabladid.is

Violent storm - frettabladid.is 

visir.is

Almannavarnir á norðanverðum Vestfjörðum koma saman um kl. 16 í dag og fara yfir það sem varðar svæðið. Tekin veðrur ákvörðun um skólahald í Súðavíkurskóla og send út tilkynning ef þurfa þykir. Foreldrum er bent á að hafa í huga veðurspá og þær tilkynningar sem kunna að verða gefnar út þegar líða fer á sólarhringinn. 

sunnudagurinn 2. febrúar 2020

Janúar 2020

Þá er þessi magnaði janúar 2020 liðinn. Margir eflaust fegnir enda gekk talsvert á veðurfarslega. En það var líka gjörningaveður í fleiri en einni merkingu og því barasta ágætt að ekki verða fleiri janúardagar þetta árið. 

Fyrir utan flóð í nágrannasveitarfélaginu Ísafjarðarbæ er líkast til nærtækast að horfa til þess hversu samgöngur rofnuðu ítrekað um Súðavíkurhlíð auk þess sem oft var lokað á Steingrímsfjarðarheiði og um Þröskulda. Samkvæmt upplýsingum frá Vegagerðinni var Súðavíkurhlíð lokuð alls 9 sinnum í 8 klst eða lengur í janúar. Það er jafn oft og allan síðasta vetur og gefur kannski glögga mynd af því þegar hér ríkir vetur. Farið að bera á vöruskorti á "stór Ísafjarðarsvæðinu" um miðjan mánuðinn og hafði líka áhrif á starfsemi fyrirtækja og allt líf hér vestur á fjörðum. 

Pólitíkin tók toll, hvernig sem það bar að, en bæjarstjóri Ísafjarðarbæjar er farinn. Fyrir mína parta tel ég missi af honum, enda frambærilegur fyrirsvarsmaður fyrir sveitarfélagið og margt til lista lagt. En óþarft að fabúlera um ástæður enda margar hliðar á hverju máli. Fyrir mína parta, góð kynni og ánægjulegt samstarf við Guðmund Gunnarsson. Óska ég honum velfarnaðar hvað sem hann tekur sér fyrir hendur. 

Stjórnsýslan var líka sett í sérstakar skorður að mínu mati. Ég dreg ekki dul á það að ég er afar ósannfærður um að réttmætt hafi verið að ákvarða svo um örlög sveitarfélaga í landinu líkt og gert var með samþykkt þingsályktunartillögu um stefnumótun í málefnum sveitarfélaga á alþingi nýverið. Ég tel að þar hafi verið stigið varhugavert skref í því að virað að vettugi sjálfsákvörðunarrétt og jafnframt virða að vettugi sáttmála sem við eigum aðild að og erum skuldbundin gagnvart að þjóðarétti. Finnst mér hér einn hluti þrígreinds valds í Lýðveldinu Íslandi hafa seilst lengra en lög og landsréttur heimila. M.ö.o. tel ég að Samgöngu- og sveitarstjórnarráðherra hafi stigið óheillaspor og hafi farið á skjön við lög og að Alþingi hafi sofið á verðinum. Framtíðin mun leiða í ljós hvort það var til heilla eða ekki. 

Við búum í frábæru samfélagi hér í Súðavíkurhreppi. Það er ekki bara mitt mat heldur vil ég halda því fram að það sé staðreynd - fasti. Sveitarfélagið telur liðlega 200 manns en hér er allt að einu mikill mannauður. Við byggjum einstakt fjölþjóðlegt samfélaga sem mætti vera mörgum til eftirbreytni. Með bakgrunn í starfi á sviði útlendingamála tel ég mig hafa einhverja innsýn í það mikilvægi sem felst í því að eiga samfélag sem ekki er einsleitt, heldur er borið uppi af fólki með fjölbreyttan bakgrunn. Við erum ríkari fyrir vikið þó því fylgi ýmsar áskoranir. 

Það er ekki ástæða til þess að örvænta um örlög Súðavíkurhrepps þó ég tjái mig með dramatískum hætti í miðlum og dragi upp efni og ástæður sem kunna að hljóma líkt og hér sé verið að setja hreppinn af. Öðru nær, ég tel stöðu Súðavíkurhrepps sterka og það á margan hátt. Við búum af einstöku landslagi hér sem er söluvara eitt og sér - endalaus tækifæri og forréttindi að fá að njóta. Með tíð og tíma, ef vilji er fyrir hendi, er auðvelt að selja fólki hugmynd um að fara hér um og njóta þess.

Ég tel að við ættum að einblína á að bjóða heim og sýna fólki hvað býr hér undir fjöllum við Djúp. Hér stendur til að halda hátíð í sumar af tilefni sem varða stofnun amk tveggja áberandi stoða í Súðavíkurhreppi, en þar er tækifæri til að minna á hvað hér er að finna.

Langtímamarkmið ætti að vera að styrkja umhverfi fyrirtækja sem hér starfa og opna á fleiri möguleika til þess að halda uppi traustri atvinnu. Þá er liður í því að byggja hér húsnæði sem nýtist í því að efla samfélagið. Sýn mín á sveitarfélagið er sú að hér sé miklu meira en sjálfbært samfélag þrátt fyrir mannfæð, enda held ég að enginn hafi skýrt sjálfbærni til hlítar í skilningi sveitarfélaga þannig að það haldi vatni. Það hefur í það minnsta ekkert með fjölda íbúa að gera, ekkert til minnkunar að kaupa að þjónustu sem varðar hlutverk hreppsins enda eru fá sveitarfélög á landinu sjálfum sér nóg um allt sem lítur að því að veita þjónustu. 

Ég ætla að deila með ykkur hluta af þeirri sýn sem bið mér blasir og hvernig ég sé mitt nánasta umhverfi hér í Súðavík, en ætlan mín er að deila einnig með mér því sem við mér blasir um allt sveitarfélagið frá hreppamörkum á Súðavíkurhlíð inn að Ísafjarðará, enda er hreppurinn stór landfræðilega. Súðavíkurhreppur er fullur af tækifærum sem fólk þarf að fá hvatningu og tækifæri til þess að nýta samfélaginu öllu til heilla.

Ég skil vel þá sem hér hafa búið þrátt fyrir ýmsar áskoranir, enda hefur ekki alltaf verið auðvelt með atvinnu eða nábýli við náttúruöfl. En enginn staður á landinu er laus við einhverja vankannta með veður eða jarðhræringar, enda búum við á eylandi sem er byggt upp af eldfjöllum sem hafa ekki að öllu lokið virkni sinni, á sprungusvæði sem liggur gegnum landið og teygir sig og skiptir landinu. Fári staðir hafa verið lausir við sveiflur í atvinnulífi og hafa flest svæði átt sinn uppgangstíma og hnignun. Ég tel óþarfa hrakspár vera með mannfjöldaspá á Vestfjörðum og tet að slíkt byggi á uppgjöf og stefnuleysi í málefnum landsbyggðar. Að fyrir löngu sé búið að gefa upp á bátinn að hér þrífist byggð, hvað þá eflist. Það eru engin lögmál sem valda því hver íbúatalan er á Vestfjörðum í dag, öllu heldur ákvarðanir teknar á alþingi og af stjórnvöldum sem töldu sig hafa vald til þess að ákveða og skipta eftir einhverri fyrirframskrifaðri forræðishyggju. 

Verið stolt af Súðavíkurhreppi enda er hér fallegt, veðursælt víðast og gott að búa. Ekki síst í Súðavík við Álftarfjörð. 

Bragi Þór Thoroddsen 

Eldri fćrslur
Vefumsjón